Pladiga.Com

Medio Rural garante o proceso de selección transparente da empresa pública Seaga, que permitirá mellorar as condicións do persoal de reforzo contra incendios

A Consellaría do Medio Rural sinala que informou, xa o ano pasado e ao inicio desta campaña, os sindicatos da contratación do persoal temporal de reforzo de verán a través da empresa pública Seaga, de cara a incrementar a profesionalización e a eficiencia do dispositivo cun mando único.

Santiago de Compostela, 16-04-2008 A Consellaría do Medio Rural mantén un dispositivo de prevención e extinción de incendios permanente durante todo o ano conformado por persoal laboral e funcionario, ao que se lle engade un reforzo na tempada de máximo risco que, a partir desta campaña, asume a empresa pública Seaga na súa totalidade, no proceso de consolidar o mando único do operativo. Este proceso iniciouse o ano pasado coa asunción e centralización das brigadas que anteriormente se contrataban a través dos concellos.

Os sindicatos foron informados dende a creación da empresa pública Seaga desta planificación programada pola Consellaría do Medio Rural, co obxectivo de que o persoal de reforzo se integrase na mesma de forma progresiva, cun sistema de contratación exactamente idéntico ás listaxes de Función pública, en canto á igualdade de oportunidades segundo méritos, capacidade, publicidade e transparencia. Así, o proceso aberto de selección do persoal é igual de transparente que o de convocatorias anteriores debido ao carácter público de Seaga.

De feito, en moitas categorías entran todos os que cumplen os requisitos e están inscritos na convocatoria e mesmo se chegou a recorrer ao INEM porque se agotaron as listaxes, como xa aconteceu o ano pasado. Daquela, calquera valoración de falta de transparencia e igualdade de oportunidades é rotundamente falsa.

Medio Rural sinala que a contratación mediante a empresa pública Seaga do persoal de reforzo para a campaña de verán vai na liña de maior profesionalización do dispositivo.

Seaga é unha sociedade pública creada pola Xunta para a realización de actuacións e prestación de servizos encomendados, fundamentalmente en materia forestal e relacionados coa prevención e loita contra incendios. Polo tanto, non se trata de ningunha privatización do servizo.

Fonte: Web da conselleria do Medio Rural