Pladiga.Com

Transcorrido un ano dende que o Partido Popular gañara as eleccións ó Parlamento de Galicia, na asociación profesional Apropiga -que agrupa ós traballadores do Servizo de Prevención e Defensa contra os Incendios Forestais da Xunta de Galicia (Spdcif)- queremos facer a seguinte declaración ó respecto da política de prevención e extinción de incendios forestais do actual goberno.

O Partido Popular, presentouse ás eleccións do 1 de marzo de 2009 cun programa electoral que, na páxina 114 dicía o seguinte:

“De maneira prioritaria, reforzaremos o carácter público do Servicio de Defensa Contra Incendios Forestales da Xunta de Galicia, exemplo durante anos de profesionalidade e eficacia, reestablecendo o mando único na loita contra os incendios forestais e realizando a totalidade das contratacións da campaña de verán do Plan de Defensa Contra Incendios Forestais de Galicia a través das listas oficiais de contratación da Xunta”

As listaxes ás que se refire o texto anterior son as que se rexen polo decreto da consellería de Presidencia 37/2006 do 2 de marzo, que regula as listaxes de contratación do persoal interino e temporal na Xunta de Galicia.

Un ano despois e trala campaña de incendios do ano 2009 -que asumiu o novo goberno co mesmo dispositivo que tiña establecido o anterior conselleiro- seguimos agardando que se cumplan as promesas electorais do Partido Popular. Ás portas do comezo da precampaña deste ano, a Consellería aínda non fixo ningún anuncio de cal vai ser a estructura do dispositivo de prevención e extinción para a campaña de alto risco de incendios de 2010.

O presidente Núñez Feijoo e o conselleiro de Medio Rural, Samuel Juárez -como responsable da política forestal e de prevención de incendios- aínda non cumpliron co que aparece recollido no seu programa electoral. Prometeron que a empresa Seaga -creada polo bipartito como instrumento clientelar que buscaba beneficiar a persoas da súa corrente ideolóxica- ía ser eliminada da prevención e extinción de incendios forestais para reforzar o Spdcif na época de máximo risco de incendios efectuando as contratacións polas listaxes do decreto 37/2006 nas que figuran profesionais con ampla experiencia e formación e que foron despreciados durante o goberno anterior para beneficiar as contratacións paralelas a través de Seaga.

Ante o silencio complice da Consellería de Medio Rural, que parece indicar que prentende seguir facendo unha política de prevención e extinción a través da empresa Seaga, limitándose a substituir ó seu xerente actual –nomeado polo anterior conselleiro Súarez Canal- para continuar cunha “limpeza” entre o persoal da empresa que lle permitiría iniciar unha política de contratación que consistiría en cambiar a uns traballadores por outros, dende Apropiga queremos lembrarlle ó goberno galego que as promesas electorais están para cumplirse; que Seaga é unha empresa que non mellorou en nada a política de prevención e extinción de incendios en Galicia; que xa existen unhas listas públicas, transparentes e reguladas pola propia administración que deben ser o único medio de contratación porque nelas están os verdadeiros profesionais da prevención e da extinción en Galicia; e, por último, que manter a duplicidade do dispositivo das últimas campañas –Seaga por un lado e Spdcif por outro- tan só xenera confusión, desorganización, e descooordinación dos medios á hora de facer fronte ós lumes, restando eficacia nos desenvolvemento do noso traballo, ademais de xerar unha duplicación inxustificada do gasto nos presupostos da Xunta de Galicia que contrata, a través de Seaga, o que xa ten na consellería de Medio Rural.